အင်တာနက်ကြောင့် ဖြစ်သော စိတ်မူမမှန်မှုများ

 

 

 

ကမ္ဘာ အရပ်ရပ်မှာရှိတဲ့ ကွန်ပျူတာများကို ဆော့ဖ်ဝဲပရိုဂရမ်တစ်ခုကို အသုံးပြုပြီး သတင်း အချက်အလက်များ ထုတ်လွှင့်ခြင်း ၊ ပေးပို့ခြင်း ၊ ရယူခြင်းများတို့ကို လုပ်ဆောင်ပေးနိုင်တဲ့ အင်တာနက် internet ဆိုတဲ့ စနစ်တစ်ခုပေါ်ပေါက်လာခဲ့ခြင်းဟာ လူ့ဘောင်လောကအတွက် အလွန်ကျေးဇူးများလှပါတယ်။

မူလအစကမူ ရိုးရှင်းလှတဲ့ ကွန်ပျူတာကွန်ယက် ARPANET နဲ့စတင်ခဲ့ခြင်းဖြစ်ပါတယ်။ အခုဆိုရင် အင်တာနက်ဟာ တစ်ကမ္ဘာလုံးရှိ အိမ်များ ၊ စီးပွားရေး လုပ်ငန်းများ ၊ ကျောင်းများ ၊ ရုံးများ ၊ စာကြည့်တိုက်များကို ရောက်ရှိ နေပြီဖြစ်ပါတယ်။

မူလရည်ရွယ်ချက်က ပညာရေးဆိုင်ရာ သုတေသန လုပ်ငန်းများနဲ့ စစ်ဘက်ရေးရာ ကာကွယ်ရေးလုပ်ငန်းများအတွက်သာ အသုံးပြုရန် ်တည်ထောင်ခဲ့ခြင်းဖြစ်ပြီး ဖိုင်လ်များလွှဲပြောင်းခြင်း ၊ e-mail များပို့ခြင်းနဲ USENET လို့ခေါ်တဲ့ Forum မှတဆင့် သတင်း အချက်အလက်များ ပေးပို့ခြင်းတို့ကို လုပ်ဆောင်နိုင်ခဲ့ပါတယ်။

အဲဒီ နောက်မှာ တော့ HTTP (hypertext transfer protocol) တိုးတက် ကျယ်ပြန့် လာမှုကြောင့် စာသား ၊ ရုပ်ပုံ ၊ အသံဖိုင်လ်များကိုပို့ဆောင်နိုင်သော webpages လို့ခေါ်တဲ့ hyperlinked electronic documents မှတဆင့် အင်တာနက်ကို အသုံးပြုသူများက အချင်းချင်း ဖိုင်လ်များကို ပို့ဆောင် ကြပါတယ်။

ရုပ်ပုံ ၊ အသံဖိုင်လ် ၊ ရုပ်ရှင်ကားများကိုပါ ပေးပို့နိုင်ပြီး ကမ္ဘာပေါ်ရှိ လူများ အချင်းချင်း ဆက်သွယ်ရေး ၊ ဖျော်ဖြေရေးအတွက်ပါအသုံးပြုလာကြပါပြီ။ ပညာရပ်ပိုင်းဆိုင်ရာနဲ့ပတ်သက်လို့ သိလိုသမျှကိုလည်း အင်တာနက် စာမျက်နှာပေါ်မှာ ရှာဖွေပြီး လေ့လာနိုင်ပါပြီ။ အင်တာနက်ကို ကောင်းတဲ့ဘက်ကနေ အသုံးချလို့ရသလို အင်တာနက်ကြောင့် စိတ်မူမမှန်တော့တဲ့သူတွေလည်း ရှိပါတယ်။

ငှက်တွေ နေ့စဉ်နေ့တိုင်း သင့်ခေါင်းပေါ်ကနေဖြတ်ပြီး ပျံသန်းနေကြတာကို တားဆီးလို့မရနိုင်ပေမဲ့ သင့်ခေါင်းပေါ်မှာ ငှက်သိုက်လာမဆောက်အောင်တော့ သင် တားမြစ်နိုင်ရပါမယ် ဆိုတဲ့ တရုတ်စကားပုံတစ်ခုလိုပါပဲ။ အင်တာနက်ကတော့ ရှိနေတာပါပဲ။ ရှိနေတဲ့ အင်တာနက်ကနေ မိမိဘဝအတွက် အကျိုးဖြစ်ထွန်းအောင် ယူလို့ရသလို အကျိုးမဲ့အောင်လည်း ယူလို့ရပါတယ်။ အသုံးချပုံပေါ်မူတည်ပြီးတော့ ကောင်းကျိုး၊ ဆိုးကျူးဖြစ်လာနိုင်စေပါတယ်။

ဆိုးကျိုးဖြစ်လာစေတာတွေထဲမှာ စိတ်ကစဉ့်ကလျားဖြစ်ပြီး မူမှန်စိတ်မဟုတ်တော့တာတွေ အနည်းနဲ့အများပါရှိပါတယ်။

၁။ Internet Asperger's Syndrome (The Troll )

ကျောင်းမှာစာတော်ပြီး စိတ်ပုံမှန်နဲ့ ကလေးတစ်ယောက်ဟာ ကီးဘုတ်နဲ့ ကွန်ပျုတာမော်နီတာကို အသုံးပြုပြီး အင်တာနက် chatroom နဲ့ အင်တာနက် စာမျက်နှာများပေါ်မှာ သူတစ်ပါးကို ဆဲဆိုခြင်း၊ ပြင်းပြင်းထန်ထန် မကြားဝံ့မနာသာများကို ပြောဆို (ရေးသား) မှုများကို ပြုလုပ်တာပါ။ အင်တာနက်စာမျက်နှာများပေါ်က ကိုယ့်လိုပဲ community forum မှာအသင်းဝင်ဖြစ်နေတဲ့ တခြားသူများအပေါ် စာနာညှာတာမှုမရှိဘဲ ပုတ်ခတ်ပြောဆိုရေးသားမှုများဖြစ်ပါတယ်။

ပြင်ပမှာတော့ ဒီကိစ္စမျိုးကို Asperger's Syndrome လို့ခေါ်ပါတယ်။ ကိုယ် ပြောဆိုသုံးစွဲလိုက်တဲ့ စကားလုံးတွေကြောင့် တစ်ဘက်သားရဲ့ မျက်နှာ အမူအယာအပြောင်းအလဲ နဲ့ စိတ်ခံစားမှုကို မတွေ့မမြင်ရတဲ့ အင်တာနက်မှာ တစ်ဘက်သားကို စာနာမှုတွေကလည်း ကင်းဝေးကာ ရိုင်းစိုင်းတဲ့ စကားလုံးများနဲ့ ပြောဆိုဆက်ဆံတာပဲဖြစ်ပါတယ်။

လှုမှုဆက်ဆံရေးအဆင်မပြေမှုများ၊ လူအများနဲ့ လိုက်လျောညီထွေ မဆက်ဆံနိုင်သူများ၊ သူတို့ကိုယ်သူတို့ အကျိုးမဲ့သူ၊ အကျိုးမရှိသူလို့ စိတ်ထဲမှာ ထင်မြင်နေသူများဖြစ်တတ်ပါတယ်။

၂။ Low Cyber Self-Esteem (The Guy Who Everyone Hates but Who Never Leaves)

အင်တာနက်ဟာ လူတိုင်းအတွက် မိမိအိမ်လိုပဲသဘောထားစရာဖြစ်လာြပီး online community forum များ၊ chatroomများမှာ လူအများနဲ့ သဟဇာတမဖြစ်တဲ့ လူတစ်ဦးတစ်ယောက် ရှိတတ်ပါတယ်။ လူအများက မနှစ်သက်ကြပေမဲ့လည်း သူကတော့ နေ့စဉ် ပုံမှန် အမြဲ အင်တာနက်မှာ ဝင်ရောက်ပြောဆို ဆွေးနွေးရေးသားဆဲပါ။

ပြင်ပမှာတော့ Attention seeking behavior ဖြစ်ပါတယ်။

လူအများက မနှစ်သက်လို့ မင်း ဝင်မပြောနဲ့လို့ ပြောလိုက်တာကိုပဲ သူက ပျော်ရွှင်ပါတယ်။ သူ့ကို ဂရုစိုက်တယ်လို့ ထင်ပါတယ်။ သူ ရှိနေတယ်ဆိုတာကို အသိအမှတ်ပြုခြင်းခံရလို့ သူ့စိတ် ပျော်ရွှင်ပြီး ဆက်လက်ပါဝင်ရေးသားပြောဆိုနေခြင်းဖြစ်ပါတယ်။

၃။ Online Obsessive-Compulsive Personality Disorder ( The Grammar Nazi)

အင်တာနက်ပေါ်မှာ စာပေါင်းများစွာရေးသော်လည်း စာလုံးပေါင်း သတ်ပုံ၊ သဒ္ဒါနဲ့ ဝါကျဖွဲ့စည်းပုံ မှန်ကန်ချင်မှ မှန်ကန်ပါမယ်။ အင်တာနက်ဆိုတာ စာအရေးအသားနဲ့ သဒ္ဒါကို ဂရုပြုစရာမလိုဘူးဆိုတဲ့ အကြောင်းပြချက်နဲ့ ရေးချင်သလိုရေးပါတယ်။

အခြားသူတစ်ဦးတစ်ယောက်ရေးထားတဲ့ စာတစ်ပုဒ်ဟာ သပ်ရပ်မှန်ကန်နေတယ်ဆိုရင် မိမိစိတ်မှာ စိတ်ရှုပ်ထွေးမှုတွေဖြစ်လာတဲ့ စိတ်သဘောပါ။

၄။ Munchausen by Internet ( The Sob Story Teller)

အင်တာနက်ပေါ်မှာ တကယ့်ကို အပြစ်ကင်းပြီး (နုံအ လှပြီး) အမြဲတမ်း ဝမ်းနည်းကြေကွဲစရာအဖြစ်တွေ ရှိနေသူပါ။ သူ့ဆီမှာ တစ်နေ့တစ်မျိုး ဝမ်းနည်းစရာအဖြစ်တွေ ၊ သူ့ကို သနားစရာအဖြစ်တွေ တစ်မျိုးပြီးတစ်မျိုး မရိုးရအောင် ရှိနေပါတယ်။ သနားကြင်နာမှုများနဲ့ သူ့ကို နွေးထွေးစွာ ကြောင်ပေါက်စပုံလေးများ ပို့ပေးခြင်း ၊ ပန်းစည်းပုံများပို့ပေးခြင်းစသည်ဖြင့် အားပေးစကားများပြောကြားပါတယ်။

များမကြာမီမှာပဲ သူ့ဆီက သူ့အချစ်ဆုံးသူငယ်ချင်း ကွယ်လွန်သွားခြင်း (သို့မဟုတ်) သူ့မိဘ တစ်ဦးဦးကွယ်လွန်သွားခြင်း စတဲ့ ဝမ်းနည်းဖွယ် ဇာတ်လမ်းများ ထပ်ကြားရပါဦးမယ်။ သူ နေမကောင်းဘူးလို့ဆိုတာလည်း ကြားပါမယ်။ တကယ်လို့များ သင်က သူ ဟန်ဆောင်နေတာလို့ သံသယဖြစ်ပြီး စုံစမ်းမိတဲ့ခါ တကယ်ဖြစ်နေတာတွေ့ရှိရရင် သင့်ကိုယ်သင် နောင်တရပါဦးမယ်။

ပြင်ပမှာတော့ Munchausen Syndrome လို့ခေါ်ပါတယ်။ သူ့စိတ်ထဲမှာ ဒီဝမ်းနည်းကြေကွဲဖွယ်တွေကို ခံစားလာရတာ အချိန်ကြာမြင့်လာပြီးနောက် အခြားသူများရဲ့ သနားကြင်နာမှုကို ရရှိလိုတဲ့အတွက် ဂရုစိုက်ခံလိုခြင်းပဲ ဖြစ်ပါတယ်။

၅။ Low Forum Frustration Tolerance ( The Frantic Browser Reloader)

ခေါင်းစဉ်အသစ်၊ စိတ်ဝင်စားစရာကောင်းတဲ့ စာတစ်ပုဒ်ကို သပ်ရပ်ကောင်းမွန်စွာ ရေးသားလိုက်ပြီး forum post မှာတင်လိုက်ပါတယ်။ အဲဒီနောက်မှာတော့ ကိုယ့် post အပေါ်မှာ အခြားသူများရဲ့ ထင်မြင်ချက်များကို စောင့်ကြည့်ပါတယ်။ ၅စက္ကန့် တစ်ခါလောက် F5 ကိုနှိပ်ပြီး page ကို refresh လုပ်ပြီး ကိုယ့်စာအပေါ်မှာ comment ရှိ၊ မရှိ စောင့်ကြည့်ပါတယ်။

မည်သူတစ်ဦးတစ်ယောက်ကမျှ comment ရေးသားခြင်း မရှိသေးဘူးဆိုရင် ဘယ်လိုလဲ...ဘယ်သူမှ မရှိကြဘူးလား။ ဘယ်သူမှ ထင်မြင်ချက်မပေးနိုင်ကြဘူးလားလို့ စိတ်မရှည်ဒေါသဖြစ်လာသူပါ။

ပြင်ပမှာတော့ Low Frustration Tolerance လို့ခေါ်ပါတယ်။ ၇ နှစ်သားအရွယ် ကလေးတစ်ယောက်က ကစားစရာ ကားရုပ်ကလေးကို လိုချင်လို့ အော်ဟစ်နေတာနဲ့ ဥပမာပြပါတယ်။ လက်ရှိအခြေအနေကို မကျေနပ်၊ စိတ်မရှည်သူပါ။

ချက်ချင်းတုံ့ပြန်ချီးမွမ်းမှုကို လိုချင်တဲ့ သည်းမခံတတ်သူများပါ။

၆။ Online Intermittent Explosive Disorder ( The Thin-Skinned Rage-o-holic)

အင်တာနက် စာမျက်နှာပေါ်မှာ အသေးအဖွဲကိစ္စလေးကို ဒေါသတကြီး ဖြစ်တာပါ။ ဟမ်ဘာဂါဆိုင်က မိမိဝယ်တဲ့ အိတ်ထဲမှာ အာလူးကြော်ကို ထည့်ပေးလိုက်ဖို့ မေ့သွားတာကို မိမိတစ်အိမ်လုံး အသတ်ခံရလို့ စိတ်ခံစားမှုဖြစ်သလိုမျိုး အင်တာနက်ပေါ်မှာ ရေးတာမျိုးပါ။

ပြင်ပမှာတော့ Intermittent Explosive Disorder လို့ခေါ်ပါတယ်။

ပြင်ပမှာ အခြားသူများကို စိတ်ဆိုးဒေါသဖြစ်တဲ့အခါမှာ အော်ဟစ်ပြောဆိုလိုက်ဖို့ကို ကြောက်ရွံ့တဲ့စိတ်ဟာ အင်တာနက်ပေါ်မှာ ပေါက်ကွဲထွက်တာမျိုးပါ။ ထူးဆန်းတာကတော့ keyboard မှာ Caps Lock ကိုဖွင့်ထားပြီး စာလုံးအကြီးများနဲ့ မော်နီတာပေါ်မှာ ရေးသားကာ စိတ်တိုဒေါသကြီးနေသူကတော့ ရုံးခန်းထဲက အလုပ်စားပွဲမှာ အေးအေးသက်သာ ကော်ဖီသောက်ရင်း၊ ဘေးနားက လုပ်ဖော်ကိုင်ဖက်နဲ့ အေးအေးဆေးဆေး စကားပြောနေရင်း ရေးသားနေတာ ဖြစ်တတ်ပါတယ်။

အင်တာနက်ဟာ အံ့သြစရာကောင်းလောက်အောင် အကျိုးကျေးဇူးများသလို အံ့သြစရာကောင်းတဲ့ လူတွေအဖြစ်ကိုလည်း ရောက်ရှိသွားစေနိုင်ပါတယ်။

(ကိုးကား ။ Jonathan Kimak ၏ 6 new personality disorders caused by the Internet )

http://www.cracked.com/article_17522_6-new-personality-disorders-caused-by-internet.html

 

                                        

                                                                                                                    ဟနစံ

                                                                                        ၂ရက်၊ ဖေဖော်ဝါရီလ၊ ၂၀၁၁ ခုနှစ်။